يا بلاش قناة بــ 1000 دينار


بوشيخة - الدار

بعد ما تبرعوا النواب المحترمين لقناتهم الخاصة بمبلغ الف دينار المنحة الاميرية..وهي حركة مكشوفة ودعوة مبطنة لمؤيدينهم او اللي يتابعونهم للتبرع بالمنحة او بجزء منها للقناة اللي تعود ملكيتها لهم..صار معلوم لي وحتى حق البنغالي اللي يصب لهم جاي وقهوة بالقناة آخر الليل..ان النواب مومحتاجين للمنحة وتحديدا استغلوها لعمل دعاية مضروبة للتبرع لهم..وهني يدخل علم التفسير الكويتي هذا الداء المزمن عند معظم الكويتيين..وكوني كويتي كامل اللقافة والدسم..سألت مدير محطة تلفزيونية عن قيمة الالف دينار وشنو دورها بمصاريف القناة..فقال لي وجاوبني بعد ما تنحنح ومز زقارته..يا الحبيب الف دينار حق ربع ساعة فضائية ما تكفي..قول عشرين الف ميتين الف يمكن تكفيك عشرين يوم لبث قناة بشكل مباشر هذا غير الرواتب واجور التشغيل واجور استئجار القمر الصناعي والتردد..عرفتوا الحين يا حلوين شنو القصد من التبرع؟

انا قريت التبرع بالمنحة من النواب للقناة كالآتي..هو تسديد فاتورة لقاءاتهم بالقناة وترددهم واستضافتهم بالبرامج..وهذا منعطف خطير يأكد على وجود اعلام داثر ومأجور..يعني كل كويتي يقدر يتبرع لهم بالالف مالت المنحة مقابل انه يطلع عندهم بالبرنامج ويقول اللي يبي..طبعا بعد ما يتلون عليه تعليماتهم ويعطونه الخطوط الحمرا بشرط انه يهاجم رئيس الحكومة ويمدح «الجزيرة» وبكلمته الاخيرة يقول «الا الدستور»... هلا والله..خوش اعلام وعلى عينك يا تاجر وبرعاية نيابية بعد..وتقولون اعلام فاسد؟ انتو مو بس اعلام مأجور..الا انتو اعلام ماجن ومفصخ وبدون هدوم...صج الطاسة ضايعة ووزارة الاعلام نايمة ..شلون يقبلون تبرع بدون ترخيص؟

وشلون تسمح الوزارة لهم بالبث من داخل الديرة بدون رخصة بث؟ وشلون صارت ووين بتصير هالسالفة العمية..ياخذون منحة من الامير الله يحفظه ويدفعونها لإعلام ماجن علشان يتهجمون على شخوص الوزراء ويسبون الديرة ويفتتنون بين اهل الكويت؟ والسؤال الأهم، بأي مادة دستورية استعانوا على هالفعل المشين؟ والا الدستور على كيفهم؟ صدق المثل وانطبق عليهم..اذا ما تستحي افعل على ما تشتهي..

Boshi55a@hotmail.com